حتى لقيت لي تبغيني عد جيتي تسولي فيا يونس بولماني 2018 younes boulmani

يونس البولماني :

شخصية اليوم هي شخصية كبرات بين واحات تافيلالت و بالضبط مدينة ارفود المدينة السياحية المعروفة بانتاج التمور ،و واحاتها الخلابة ،و كتميز بطيبوبة اهلها كباقي مدن الجنوب الشرقي دار الكرم و الجود ….لتافيلالت بصفة عامة الى بغينا نهضرو عليها خاصنا يامات و ليالي باش نهضرو عليها حيت كبيرة و فيها بزاف ميتقال حتال شي فرصةو نهضر ليكوم عليها على شكل فقرات ،و غادي نخليكوم مع هاد الشخصية المتألقة عندنا فصفحة #تنغير_تمغرا. هاد الشخصية المتألقة كتمثل فالفنان الموسيقي يونس بولماني ابن مدينة ارفود،هو شاب من الثلاثينيات فعمرو ،بدا الموسيقى فعمر صغير عن طريق العزف على آلة لبيانو كيفما تايسميوه l org ، ملي كان فعمرو 13 او 14 سنة ، كان تيقرا فالسادسة ابتدائي أنذاك ،حاول يندمج بين الدراسة و الهواية،دوز حتى هو الطفولة ديالو كباقي اطفال ارفود مخلاو حتى حي حمرية ، السلام و الجديد… اي واحد موسيقي ضروري غادي تلقاه شغوف بالقصارات دياول الاعراس .فسن خمسطاعش عام كون مع ولاد دربهم واحد الكروب صغير تيخدمو فالعراسات و هاد الفترة كان غي عازف على الآلة ،وهادي هي البداية ديالو كحرفة أوركانيست (organiste) ، من بعد عامين دخل مع واحد الاركسترا معروف فأرفود عبد الرحمان الدكيس ، كعازف آلة اﻷورك تعلم عندو حتى هو شوية،من بعد خدم معا احد اعمدة البلدي فأرفود اوركسترا عبد الجبار تقريبا ست سنين ،حتى خرجوا بعض انواع الاورك الذكية (org inteligent) من تما بدا المسيرة ديالو كمغني و عازف في نفس الوقت ،و لا تعرف في المنطقة و انحاءها ولاو الناس تيعرفوه فالعراسات حتى تشهرات سمية يونس بولماني. من بعد واحد العامين ديال العزف و الغناء بوحدو فالعراسات والحفلات ، ف 2009تلاقا بصدفة فواحد الحفلة مع سويلم الجرفي ، و غناو وكان واحد الانسجام بيناتهوم ،وزاد واحد الجمالية ليونس بولماني من خلال ادائه لبعض الاغاني الجرفية (نسبة لفن البلدي ) و من خلال تفاعله مع الجمهور في السهرات و الحيوية و النشاط …من ديك الليلة خرجات سمية يونس بولماني و سويلم الجرفي.. دازت اربع سنوات على دخول سويلم و الاستمراية فاحياء الحفلات و المهرجانات جا الدور باش يلتحق بيهوم فنان شاب محترف فصنف الراي المعروف بالشاب عبدو احد المعجبين بالثنائي ،عندو مزيان مع موسيقى الراي اضافة الى الصوت اللي عطاه سيدي ربي ماشاء الله عليه . هو يضيفوه معاهوم للفرقة تيعاون معاهوم فالكورال . اللي خلانا اليوم نشوفو فرقة المحبة برئاسة يونس بولماني يونس من بين الفنانين فأرفود اللي تيكتبوا اغانيهوم و تيلحنوهوم ،حيت الاغلبية تيرجع للذاكرة و القصائد لقدام دياول جرافة والبلدي كمثال البراد امينة ،ماعيشة يالالة،لحرامية…. بالعكس حاول يكتب الكلمات دياولو باش يزيد يغني الفن الارفودي و يكون واحد التنوع .غي ديما الايقاع تايكون بلدي و الكلمات من التأليف ديالو . الى جينا نصنفوه نوع الموسيقى اللي تايدير غادي نلقاوه تيدير موسيقى شبابية عصرية مأخودة من ايقاعات البلدي باش تيتعرف ،و من بين الاغاني الناجحة دياولو دازت قدامي و يا محلاها… جوتيم انا جوتيم … سيد القاضي و اللي خلقات مشاهدات بزاف هي حتا لقيت اللي تبغيني عاد جايا تسول فيا …. هاد الاغاني دياولو تيغنيهوم بواحد الطريقة جميلة ما عليك الا البحث عنهوم فاليوتوب . هاد السيد حتى هو ولد عائلة على قد الحال مرة مرة حتى هو تيهز العتلة و تيهود للجنان ،الى مكاينينش لعراسات ولا الحفلات تايمشيو لبعض الفنادق فأرفود و تيحيي فيها السهرات رفقة الفرقة ديالو … نجيو نهضرو على الثلاثي مجموعة المحبة اللي فهاد الاواخر تعرفات بجميع انواع الموسيقى اللي كتدير البلدي المغربي الامازيغي ،الشرقي الراي …شاركات فبعض المهرجانات المحلية كان تفاعل كثير ديال الجمهور لدرجة ولاو تيحفظو اغانيهوم ،و مكيترددوش لأي واحد عيط ليهوم مهما كانت المسافة الريصاني ميدلت، الراشيدية ،تنغير ورزازات …. نحن كصفحة #تنغير_تمغرا اختارينا هاد الشخص باش نشجعوه حيت الصوت ديالو وصل انحاء الوطن من خلال اغاني قديمة أداهم كمثال اغنية مولاي احمد الحسني و عاود حياهوم و باقي اغانيه اللي كتحمل كلمات جميلة … اللي خلاتو يحقق مشاهدات كبيرة فالمواقع الاجتماعية .وبغينا من هاد المنبر نسلمو على ناس تافيلالت و يشجعو هاد الشاب مزال يقول كلمتو ان شاء الله .

One Reply to “حتى لقيت لي تبغيني عد جيتي تسولي فيا يونس بولماني 2018 younes boulmani”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *